Макрон проговори за контроверзното видео: Брижит му удри шлаканица?!
Францускиот претседател Емануел Макрон во понеделник ги отфрли шпекулациите за виралното видео на кое првата дама на Франција, Брижит Макрон, го турка по лицето додека се во претседателскиот авион по пристигнувањето во Виетнам.
„Се шегувавме, ништо повеќе, ништо помалку. И ова се претвори во некаков вид геополитичка катастрофа“, рече Макрон, негирајќи ги тврдењата за брачен спор.
Видеото, кое го снимија бројни меѓународни новински агенции, го прикажува моментот кога вратите на претседателскиот авион се отвораат во недела навечер и ја покажува раката на првата дама како го турка лицето на претседателот.
Додека се симнуваа по скалите за да ги поздрават виетнамските функционери, Макрон ѝ ја подаде раката на сопругата, која се чинеше дека го игнорираше гестот.
Макрон ја критикуваше онлајн бурата што се појави околу ова видео.
„Гледам многу луди луѓе кои трошат многу време анализирајќи ги овие видеа“, рече тој, посочувајќи на она што го опиша како претерани или лажни наративи на социјалните медиуми.
Тој наведе уште два неодамнешни примери каде што неговите снимки биле погрешно протолкувани.
„Во последните три недели, луѓето гледаа снимки и мислеа дека делам кеса кокаин, дека се тепам со турскиот претседател, а сега се расправам со сопругата. Ништо од тоа не е вистина“, рече Макрон.
Тој, исто така, посочи дека надворешни актери ги поттикнуваат гласините.
„За ширењето на вакви работи, Русите се добри сојузници, а екстремистите во Франција се одлични посредници“, рече тој.
