Макрон и Шолц бараат нови избори во северно Косово
Белград и Приштина повторно да одат на избори во северно Косово.
Ова го предложија францускиот претседател Емануел Макрон и германскиот канцелар Олаф Шолц. По заедничките средби на Макрон и Шолц со претседателите на Србија и на Косово, Александар Вучиќ и Вјоса Османи, францускиот лидер изјави за новинарите дека тензиите на северот на Косово се резултат на локалните избори на кои само три отсто од запишаните гласачи излегоа на 23 април.
„Ги повикавме двете страни да организираат нови избори што е можно поскоро во четири општини (на северот на Косово) и на нив да учествуваат српските претставници“, изјави Макрон за новинарите по европскиот самит на политичката заедница.
Макрон изјави и дека шефот на европската дипломатија Жозеп Борел ќе разговара со лидерите на Србија и Приштина за прашањето за одржување нови избори.
„Како што знаете, Германија и Франција предложија план и сега треба да се спроведе“, додаде Макрон.
Oва се однесува на Договорот за патот кон нормализација на Белград и Приштина, за кој лидерите на двете страни се договорија на 27 февруари и 18 март.
Во близина на зградите на локалните самоуправи во Лепосавиќ, Зубин Поток и Звечан денеска продолжија протестите на Србите. Тие четврти ден по ред протестираат. Во судирите меѓу граѓаните и војниците на КФОР и припадниците на косовската полиција во понеделникот десетици лица беа повредени од двете страни, пренесе српски Курир.
