„МАКПРОГРЕС“ СЕ ОГЛАСИ ПО ПОЖАРОТ: Целосно изгоре погон, 12 вработени и пожарникари во болница, но фабриката ќе ја обновиме во Виница
Компанијата „Макпрогрес“ денеска се огласи со официјално соопштение по големиот пожар што ја зафати нивната фабрика „Винчини“ во Виница, потврдувајќи дека целосно е уништен еден производен погон со три софистицирани линии и два магацини. Од компанијата соопштија дека во инцидентот биле хоспитализирани вкупно 12 лица – девет нивни вработени и тројца пожарникари, но најважно е што нема човечки жртви.
Во првото обраќање до јавноста, од „Макпрогрес“ информираат дека сите вработени биле безбедно евакуирани. Од хоспитализираните, осум лица биле примени поради вдишување чад, а четворица се здобиле со полесни изгореници.
Менаџментот на компанијата веќе ги посетил повредените во болниците во Кочани и Скопје.
Според соопштението, пожарот, и по 27 часа од избувнувањето, сè уште е активен на две локации со помал интензитет, но надлежните служби уверуваат дека не постои ризик од негово понатамошно ширење. Причините за пожарот се истражуваат, а компанијата апелира јавноста да ги почека официјалните извештаи.
И покрај огромната штета, од „Макпрогрес“ испратија силна порака за иднината.
„Фабриката Винчини ќе ја обновиме, имаме кадар и знаење за тоа. И тоа пак во Виница“, се вели во соопштението потпишано од Глигор и Александар Цветанов.
Тие најавија дека нивен главен приоритет е да ги задржат сите вработени, преку план за прераспоредување на работниците од уништениот погон на другите функционални производни линии. Дополнително, како одговор на кризата, компанијата вети дека ќе ги задржи ниските продажни цени на своите производи, а некои дури и ќе ги намали за да поттикне поголема продажба и да ги одржи работните места.
Компанијата упати огромна благодарност до сите институции, противпожарни единици од повеќе градови, медицински екипи, полицијата, бизнис заедницата и граѓаните кои покажале огромна храброст и солидарност.
