„Макпетрол“ излезе појак од кризата! Добивката е 21 милиони евра, колку ќе добијат акционерите?
Очекувањата на акционерите од кои најголем број се вработени или пензионери на „Макпетрол“ се дека добивката е увертира за пристојан дивиденда. За тоа каква компанија е „Макпетрол“ доволно говори фактот што континуирано дели дивиденда на своите акционери, а лани подели рекорден износ од 6,6 милиони евра.
Најголемата македонска компанија за трговија на мало со нафтени деривати има одлични резултати во кризна и неизвесна година. „Макпетрол“ во услови на голема неизвесност на глобалниот пазар на нафта и деривати и силни дисторзии на домашниот пазар на природен гас успеа да ја одржи и подобри својата пазарна позиција. Добивката е речиси 21 милиони евра и тоа е одлична вест за бројните домашни акционери во таа компанија.
Финансиските резултати на „Макпетрол“ покажуваат дека лани приходите од продажба надминале 604 милиони евра што е за 74 отсто поголем резултат од претходната 2021 година. Најголем придонес за растот на приходите всушност има зголемената цена при набавката на нафтените деривати кои компанијата ги продава на своите над 150 бензински пумпи ширум земјава. А тоа се гледа од најголемата расходна ставка – набавната вредност на трговските стоки за кои „Макпетрол“ лани платил повеќе од 537 милиони евра. Тоа е зголемување за 80 отсто во споредба со 2021 година. И во најголем дел трошокот е за набавка е за нафтени деривати. Всушност овој трошок е директна последица на глобалниот раст на берзанските цени на дериватите од нафта.
„Макпетрол“ останува доминантен продавач на македонскиот пазар за нафтени деривати.Најголем дел од приходите од домашниот пазар вредни над 570 милиони евра се од продажба на бензини, дизел горива, мазут и нафта за домаќинство.
Од извоз „Макпетрол“ лани инкасирал над 33 милиони евра што е речиси три пати подобро од претходната година.
Вредно за истакнување, од аспект на грижата за своите вработени, е тоа што „Макпетрол“ лани за сите свои вработени издвоил над 23 милиони евра односно речиси 3 милиони евра повеќе од 2021 година. Со оглед на галопирачката инфлација во земјава која негативно се одразува врз целото општество, зголемувањето на трошоците за своите вработени за 14 отсто, објективно, е потег за истакнување и за поздравување.
Оперативната добивка на компанијата лани надминува 21 милиони евра. И тоа е одличен резултат иако споредбата со 2021 година покажува намалување од 10 отсто. Веројатно оперативниот резултат лани иако помал, всушност е подобар од 2021 година во која „Макпетрол“ во останатите приходи од дејноста книжеше прилив од продажба на своите акции во „ГА-МА“ и тоа влијаеше врз целиот биланс на успех. А лани немаше останати оперативни приходи во толкав обем.
Многу вредно за истакнување е и тоа што компанијата лани успеала да ги намали за 35 отсто финансиските расходи по основ на камати и курсни разлики. Лани тие изнесуваат околу 350.000 евра, а претходната година надминувале 530.000 евра.
Од податоците во билансот на состојба вреди да се истакне тоа што вредноста на вкупните средства лани е зголемена за 17 милиони евра и нивниот износ на крај на мината година надмина 148 милиони евра.
Р.Ф.
