Македонско воено возило излетало во канал за наводнување во Косово
Воено моторно возило на македонската армија во Косово излетало во канал за наводнување.
Истото морало да биде извлечено од италијанскиот контингент.
„Во текот на вчерашниот ден (11.03.2024 година) во вечерните часови за време на извршување на доделените задачи во рамки на операцијата на НАТО – КФОР во Косово се случи лесна сообраќајна незгода во која има незначителна материјална штета на возилото (скинати гуми) без било какви последици на возачот. Имено, за време на извршување на редовна патрола од страна на припадници на Армијата со воено моторно возило во состав на нашиот контингент во зоната на одговорност во регионалната команда запад, поради лошите временски услови (слаба видливост и лизгав коловоз) возачот изгубил контрола поради што возилото излегло од патот во канал за наводнување“, информира македонската армија.
Од Армијата не ја откриваат локацијата на инцидентот, но додаваат дека возилото е во исправна состојба и неговото користење ќе продолжи во рамки на мисијата.
„Како дел од стандардните оперативни процедури, со подршка на италијанскиот контингент во чиј состав ги извршуваме задачите во регионалната командда запад, моторното возило е извлечено и транспортирано до базата каде по неопходна интервенција ќе биде повторно вклучено во извршување на задачи во склоп на мисијата“, се додава во соопштението.
ФОТО: Илустрација
