„Македонско село“ се отвора на 19 јуни

Директорот на Службата за општи и заеднички работи, Ивица Томовски, објави дека комплексот „Македонско село“ ги отвара вратите на 19. јуни.

Функционерот ова го потврди во утринската емисија на ТВ Сител, откако претходно концесијата му беше дадена на сопственикот на угостителските објекти „Ла тераца“.

– На 19 јуни ќе биде отворено „Македонско село“, најавив во моето гостување во „Ја сакам Македонија“ на Сител ТВ. Исполнуваме уште едно дадено ветување, како резултат на нашата посветеност и грижа за јавните добра, објави Томовски.

Комплексот „Македонско село“, кој се наоѓа на падините на Водно, блиску до селото Нерези, се состои од 12 автентични куќи, со простории каде се претставени македонските занаети, делови се користат како хотелски соби, а некои имаат и ресторански дел.

Комплексот не функционираше речиси седум години, откако претходните концесионери се повлекоа поради финансиски загуби.