Македонските граѓани плаќаат најскапа струја во регионот: Пониски сметки би донела конкуренцијата во изборот за универзален снабдувач!

Јавниот повик за нов универзален снабдувач со електрична енергија на регулираниот пазар на кој Владата ги повика заинтересираните компании да достават понуди со пониска маржа од 11,5%, завршува за само два дена, а досега е извесно дека на огласот ќе се јави „ЕВН хоум“, компанијата што и во моментов е универзален снабдувач.

Свое учество најави и „ЕСМ продажба“, компанија што е дел од државното електростопанство, а во трката ќе влезе и компанијата за трговија со струја ЕДС која е фирма ќерка на грчката државна компанија за производство на енергија ППС. Најавата од оваа компанија за пониска и поконкурентна маржа при учеството на јавниот повик за Универзален снабдувач за следните пет години ги вжешти страстите во битката за добивање на тендерот, а атрактивната понуда од страна на ЕДС, на маржа многу пониска од постоечката ќе значи и пониска струја за граѓаните, пишува А1он.мк.

Како на земја во која потврдено домаќинствата плаќаат најскапа струја во регионот, конкуренцијата при изборот на универзален снабдувач и е повеќе од потребна, а некои од компаниите кои ќе се јават на овој повик најавија дека ќе понудат далеку пониски цени од сегашните.

Од земјите во регионот, според податоците на Евростат, најскапа струја плаќаат домаќинствата во Македонија, 100 киловати ги чинат 10,5 евра. По нас се граѓаните на Албанија, кои плаќаат 10,1 евра, додека пак најевтина електрична енергија во Европа имаат косовските домаќинства – 0,6 евра за 100 киловати. Србите и Црногорците плаќаат 0,96, а Босанците 0,87 евра за 100 киловати.

За споредба, пак, развиените земји во ЕУ (со просек на БДП во Унијата што е шест пати повисок од Македонија по жител), плаќаат за енергијата трипати повеќе од земјите во регионот на Западен Балкан.

Според Регулаторната комисија за енергетика, секоја земја има специфични критериуми кои влијаат врз крајната цена на струјата како што се обемот на домашно производство на електрична енергија, увозната зависност, степенот на либерализација на пазарот, инвестициите во енергетската инфраструктура и инвестициите во обновливи извори на енергија.

Прочитајте повеќе на А1он.мк