Македонија стартува на Европското првенство во Хернинг против Данска
Македонската ракометна репрезентација вечерва го отвора Европското првенство во Данска, со дуел против кодомаќинот и еден од главните фаворити – селекцијата на Данска. Натпреварот започнува во 20:30 часот во Хернинг, а македонските „црвено-жолти“ влегуваат на теренот со желба да покажат карактер и борбеност.
Данска важи за ракометна сила, со богата традиција и натпреварувачи навикнати на притисок и полни трибини. Но, македонската репрезентација отсекогаш била тим кој знае да изненади и да го надмине очекуваното, а селекторот Кирил Лазаров води генерација која не се плаши од предизвици.
Македонските ракометари веќе неколку дена се во Данска, каде се подготвуваа за стартот на шампионатот. Како последна проверка, во вторникот беше одигран контролен натпревар против Митјиланд, кој нашите го добија, потврдувајќи дека тимот е во добра форма и подготвен за европската сцена.
Македонија не за првпат стартува на турнир во Хернинг против Данска – и во 2014 година го видовме истото. Сепак, секој натпревар е нова можност за историски резултат.
Нашата селекција е во групата Б заедно со Португалија и Романија. Првиот натпревар од денешниот термин во 18 часот ќе го одиграат токму овие две селекции, додека Македонија ќе продолжи со дуелите против Португалија в недела во 18 часот и против Романија во вторник во истиот термин.
Во групата, двете првопласирани селекции ќе обезбедат пласман во следната фаза, а Македонија ќе се бори до последната секунда со цел да ја претстави земјата на најдобар можен начин.
