Македонија падна за 6 места во Индексот за слобода на медиуми на Репортери без граници
Македонија падна за 6 места, односно од 36 на 42 место на Индексот за слобода на медиумите на Репортери без граници.
Таа е последна во групата држави каде ситуацијата е „задоволителна“, а покрај нас, во оваа група се и две земји од регионот.
Се работи за Словенија која напредувала за дури 9 места и е 33-та по ред, и Црна Гора која е погоре за 3 места и е моментално 37-ма.
Сите други пак се во групите со „проблематична“ или „тешка“ состојба.
Класификацијата на Репортерите без граници опфаќа 180 држави од цел свет.
Норвешка останува на првото место на Светскиот индекс на слобода на медиумите за деветта година по ред, задржувајќи ја лидерската позиција со „добри“ резултати во сите пет индикатори. Естонија се искачи на второто место, додека Холандија ја престигна Шведска за да се смести на трето место.
Сепак, индексот покажува глобален пад во слободата на медиумите, со економскиот притисок како главен фактор.
Според РСФ, економскиот показател достигна најниско ниво досега, што ја поставува глобалната ситуација во „тешка“ категорија.
За Македонија, индексот забележува пад во три од пет индикатори, најголем во политичкиот показател, додека во правната рамка и безбедноста има мал напредок.
Проблемите како дезинформации и недостаток на професионализам доведуваат до намалена доверба во медиумите, а економскиот притисок ги става медиумите на уште поголеми тешкотии во одржувањето на нивната независност.
„Финансиската независност на медиумите е неопходен услов за обезбедување бесплатни, веродостојни информации кои му служат на јавниот интерес“, порачуваар од Репортери без граници.
