МАКЕДОНИЈА ОСТАНА БЕЗ ГАСИФИКАЦИЈА: Пропадна повеќегодишниот оглас
Пропадна повеќегодишниот оглас за секундарна гасификација на Македонија,откако владата во „Службен весник“ објави дека ниту една од понудите на заинтересираните изведувачи не била прифатлива.
Владата на седницата на 30 јули донела одлука „за поништување на постапката за доделување на договор за воспоставување на јавно-приватно партнерство за финансирање,проектирање, изградба, управување, одржување и развивање на дистрибутивниот систем на природен гас во Република Северна Македонија“.
Владата досега четири пати го одложуваше изборот на компанијата која требаше да го спроведе проектот за носење природен гас до домовите и до останатите потрошувачи. Огласот беше објавен во 2019, а гасификацијата во населените места требаше да започне на почетокот на 2022.
„Постапката за доделување на договор за воспоставување на јавно приватно партнерство за финансирање, проектирање, изградба, управување, одржување и развивање на дистрибутивниот систем на природен гас во Република Северна Македонија, се поништува согласно член 114 став (1) алинеја 2 од Законот за јавните набавки(*), бидејќи не е поднесена ниту една прифатлива понуда“, објавено е во Службен весник.
Пет години се одбираше помеѓу турските компании „Акса Догалгас Дагити А.С.“ и „Палмет Енерџи Аноним Ширкети“ и се правеше евалуација на нивните понуди, откако претходно заврши првата фаза на конкурентен дијалог за доделување на договор. Според сознанијата на „Фактор“,одлуката за поништување на постапката била донесена уште во март од претходната власт, а најмногу поради тоа што се работело за истовремени понуди од фирма-мајка и фирма-ќерка, но и поради други некомплетирани работи. Најавите се дека наскоро ќе има оглас со нов модел кој би одел по побрза постапка.
Инаку одбраната компанија, според условите од договорот, ќе треба да инвестира 300 милиони евра за гасификација на населените места низ земјата. Оној што ќе го добие 35-годишниот договор ќе има право да менаџира и да остварува приход од системот со обезбедување на загревање на јавните установи, како и на комерцијалниот сектор и домаќинствата. Во најраната фаза ќе треба да ги гасифицира Аеродром, Бутел, Гази Баба, Ѓорче Петров, Карпош, Кисела Вода, Центар, Чаир, Градско, Демир Капија, Кавадарци, Крива Паланка, Куманово, Неготино, Прилеп, Свети Николе, Штип, Битола, Гостивар, Тетово, Кратово и повеќе рурални средини во непосредна близина.
Владата во декември 2019 година донесе одлука за започнување на постапка за доделување на договор на приватен партнер кој ќе го изгради и потоа ќе наплаќа од дистрибутивниот систем на природен гас во земјата, додека паралелно државниот оператор „Номагас“ ги гради магистралните гасоводи и интерконективните приклучоци. 
Според критериумите, компаниите треба да имаат најмалку 150 милиони евра годишен приход во последните три години. Инвеститорот за четири години треба да изгради најмалку 50 отсто од мрежата во градските општини и најмалку 20 отсто во руралните општини. Договорот ќе го добие оној кој ќе понуди најмала висината на надоместок за приклучок кај крајните корисници, а критериум ќе биде и висина на надоместок за концесија и времетраењето на изградбата. Според владината одлука, приватниот партнер ќе плаќа за договорот доделен од државата така што ќе издвојува однапред предвиден процент од годишниот приход.
А.К.
