Македонија не сака да ги чепка штедачите – данокот на камати се одложува до влез во ЕУ
Македонија годинава одбележува неславен јубилеј – точно 30 години откако за првпат беше напишан закон за оданочување на каматите од банкарските депозити, кој до ден денес остана само мртво слово на хартија. Од 1996 година па наваму, секоја власт најавуваше, па ретерираше, оставајќи ги штедачите во банките во привилегирана даночна положба.
Историјата на овој данок е историја на политички компромиси. Иако законот постои, неговата примена постојано се одложуваше „за подобри времиња“.
Со последните измени на Законот за данок на личен доход од 2023 година, се создаде интересна ситуација на пазарот на капитал.
Наместо да се примени веднаш, како што беше случај со другите капитални добивки, данокот на камати доби ново, неодредено одложување.
Оваа политика отвора сериозни прашања за тоа како ваквиот третман влијае врз конкурентноста помеѓу чувањето пари во банка и инвестирањето на берзата, како и врз севкупната македонска економија.
