Македонија назадува: Тајни купувачи посетиле кафулиња и продавници во регионот, еве ги резултатите!
Македонија е земјата со најголем пад во квалитетот на услуга на продажни места во споредба со останатите држави во регионот, покажува најновото истражување „Регионална услуга-GUEST“ на агенцијата Хераклеа. Истражувањето е спроведено од 1 до 30 јуни во соработка со агенции за тајна набавка од Македонија, Хрватска, Босна и Херцеговина, Црна Гора, Словенија и Србија.
Со вкупен резултат од 71,67 отсто, Македонија оваа година бележи значителен пад во споредба со минатогодишното истражување, а според извештајот, токму нашата земја има најмногу области за унапредување. Особено слабо стои во категоријата нудење дополнителен производ, која со години наназад се издвојува како најслаба точка и во регионалните просеци.
Истражувањето опфатило 400 продажни места од различни сектори – автомобилска индустрија, бензински пумпи, финансиски институции, малопродажба, туризам и угостителство, како и други услужни дејности. Тајните купувачи оценувале пет клучни елементи: поздрав, утврдување на потребите на клиентот, познавање на производот, нудење дополнителен производ и благодарност за посетата.
Најдобар резултат во регионот оваа година постигнала Босна и Херцеговина со 85,11%, и покрај благ пад во споредба со лани. Зад неа се рангираат Словенија, Црна Гора и Хрватска, додека Македонија се најде на последното место од вкупно шест земји.
Сепак, и покрај опаѓачкиот тренд, истражувањето нотира дека и во Македонија најдобри резултати се постигнуваат во категоријата познавање на производот, што укажува на добри основи, но и на сериозна потреба за обука и стандардизација на пристапот кон клиентите во останатите сегменти од услугата.
