Македонија ќе купува течен природен гас од САД
Втората сесија на Стратешкиот дијалог меѓу Македонија и САД, одржана во Вашингтон, заврши со објавување заедничка изјава која ја дефинира соработката на двете земји во областа на енергетиката, безбедноста и инвестициите. Дијалогот беше предводен од министерот за надворешни работи и надворешна трговија, Тимчо Муцунски, и заменик-државниот секретар Кристофер Ландау.
Според изјавата, двете земји се договорија за купување течен природен гас од САД и воспоставување едношалтерски систем за извоз и инвестиции. Истовремено, Македонија се обврзува да ја зголеми одбранбената потрошувачка до 5% од БДП до 2035 година и да придонесе во рамките на Списокот на приоритетни потреби на Украина.
САД, пак, ќе обезбедат техничка помош за зајакнување на дигиталната инфраструктура во македонските министерства, финансиска поддршка од 3,5 милиони долари за унапредување на капацитетите на МВР и управувањето со границите, како и пристап до програмата Global Entry, што овозможува забрзана проверка на однапред одобрени патници при влез во САД.
Во заедничката изјава се нагласува посветеност на енергетска диверсификација, подобрување на инвестициската клима и трговските односи, унапредување на сајбер безбедноста и јакнење на институционалните капацитети. Исто така, посебен акцент е ставен на зајакнување на соработката во борбата против транснационален криминал, нелегална миграција и гранична безбедност.
Дијалогот исто така ги опфати иницијативите за заштита на културното наследство и за унапредување на мобилноста на граѓаните преку приклучување кон програмите за доверливи патници.
