Македонија ќе го озакони „Биткоинот“
Биткоинот достигна уште еден историски врв и за прв пат ја премина границата од 100.000 долари.
Највисоката точка достигна 104.000 долари, што е зголемување од над 45 отсто во споредба со периодот пред претседателските избори во САД, кога криптовалутата се тргуваше под 69.000 долари.
Во Македонија владата сè уште нема создадено правна рамка за заштита на инвеститорите или јасно дефинирање како функционираат овие средства. Инвеститорите се принудени да работат во неизвесен простор, користејќи меѓународни платформи за трансакции и соочени со правна несигурност во земјата.
Но, премиерот Христијан Мицкоски вели дека во моментов тргувањето со криптовалути се врши полулегално, додека сериозно се работи на тоа да се регулира со закон. Тој вети дека Македонија ќе биде меѓу првите во регионот што ќе направи промени во оваа насока.
„Денеска би рекол дека од тука се тргува полулегално. Сакаме сето ова да го канализираме во рамките на законот, но има многу делови кои треба однапред да се усогласат и ние го правиме ова, ги усогласуваме тие акти за да дојдеме до крајниот производ. Но, да, ви велам и ова е иднината и мислам дека ќе бидеме меѓу првите во регионот, ако не и први, што ќе се обидеме да направиме нешто вакво“, изјави Мицкоски.
Некои земји во светот веќе почнаа да ги ставаат дел од своите буџети во биткоин, додека мнозинството земји во светот сè уште не го регулирале ова прашање со закон.
