МАКЕДОНЦИТЕ СЕ ГЛАДНИ ЗА СТАНОВИ – Интересот за купување недвижнини не стивнува
Интересот за купопродажба на недвижности и во втората половина од минатата година не покажува знаци на забавување.
Последните податоци кои ги објави Агенцијата за катастар на недвижнини велат дека во периодот од јули до декември 2022 година во Регистарот на цени и закупнини се внесени 17.583 трансакции.
Притоа, вкупниот број на трансакции е збир од вкупниот број на купопродажби и вкупниот број на закупи. Од нив, 12.997 се купопродажби на недвижности, каде пак влегуваат вкупниот број на продажби, продажби на лицитација, продажби од инвеститор и откуп од Република Северна Македонија. Дополнително Катастарот регистрирал уште 4.586 закупи на недвижен имот.
Бројките велат дека вкупната вреднот на купените недвижности достигнува високи 509 милиони евра.
Во анализата на Агенцијата е наведено дека има раст на бројот на купопродажби минатата година во вторите шест месеци во споредба со првите шест месеци во година.
Податоците покажуваат дека иако бројот на купопродажби регистрирани во Регистарот на цени и закупнини во периодот јули – декември 2022 година во однос на периодот јули – декември 2021 година е намален за 5 отсто, сепак има раст на бројот на купопродажби во споредба со периодот јануари – јули 2022 година.
Имено во текот на јануари – јули 2022 година биле направени 11,632 купопродажби, додека пак во јули – декември 2022 година биле направени 12.997 купопродажби.
– Во второто шестмесечје од 2022 година најмногу купопродажби се регистрирани во ноември, и тоа вкупно 2.810 купопродажби, додека во октомври се регистрирани најмалку купопродажби, и тоа 1.668 – се наведува во анализата на Агенцијата за катастар.
Бројките на Катастар покажуват дека во второто шестмесечје од 2022 година, најмногу закупи се регистрирани во ноември, и тоа вкупно 1.077 закупи, додека во август се регистрирани најмалку закупи односно 417.
Податоците покажуваат дека вкупната вредност на недвижнините издадени под закуп достигнала 2,321 илјади евра.
Притоа кај закупите исто така има раст во вторите шест месеци од годината споредено со првите шест. Имено, во периодот од јануари до јуни 2022 годиан имало 4.070 закупи, додека пак од јули до декември 2022 година биле регистрирани 4.586 закупи на недвижен имот.
Петранка Огнаноска
