„Магијата“ скапо ја чинеше: Скопјанец „лечел“ семејни проблеми со амајлија, ѝ зел 1.000 евра на жена од Делчево
Ветувањето за спас на семејната хармонија се претворило во класична измама за една 42-годишна жена од Делчевско. Полицијата поднесе кривична пријава против 61-годишен скопјанец кој ја убедил жртвата дека со „амајлија“ ќе ѝ ги реши сите проблеми.
Надворешната канцеларија за криминалистички работи Делчево го товари С.Ѓ. (61) од скопското село Сарај за кривично дело „измама“.
Како течела измамата?
Според истрагата, измамникот делувал во два наврати – во септември 2024 и во март 2025 година.
„Пријавениот ја довел во заблуда оштетената, ветувајќи ѝ дека може да ѝ изработи специјална амајлија со која, наводно, ќе ги реши нејзините семејни проблеми“, велат од МВР.
Ја наплатил „услугата“ 60.000 денари
За својата „натприродна“ услуга, скопјанецот не барал малку. Во двата наврати тој од жената наплатил по 30.000 денари.
Со ова, тој ја оштетил жртвата за вкупна сума од 60.000 денари (околу 1.000 евра), без да го исполни ветеното, по што случајот бил пријавен во полиција.
