Магија во длабочините на Охридското Езеро: Елка под вода за „малите херои“ со ретки болести
Празничната магија не ги заобиколи ниту длабочините на Охридското Езеро. Традиционално, и оваа година блесна новогодишна елка под површината на водата кај комплексот „Заливот на коските“ – Музеј на вода.
Оваа уникатна празнична честитка пристигна благодарение на нуркачите од Нуркачкиот центар „Амфора“, кои во координација со Здружението за ретки болести и со поддршка на волонтерите на Црвениот крст од Охрид, ја продолжија оваа убава традиција.
Порака на надеж од дното на езерото
Овогодинешната акција не е само атракција, туку носи и силна, емотивна порака. Таа е посветена на оние кои секојдневно водат свои тивки битки.
„Оваа празнична акција е посветена на децата со ретки болести, малите херои кои нè учат на сила, надеж и љубов секој ден. Нека празничниот дух стигне до секое срце и донесе здравје, топлина и поддршка таму каде што е најпотребна“, порачаа од „Амфора“.
Оваа подводна елка стана препознатлив симбол на Охрид пред празниците, потсетувајќи дека хуманоста и убавината немаат граници – ниту над, ниту под водата.
