„МајВорлд“ во стечај – членови на „Лајконет“ во неизвесност, се најавуваат тужби!
Австриската компанија „МајВорлд Интернешeнeл“, сопственик на кешбек платформата „МајВорлд“ и наследник на контроверзната „Лајонес“, е во стечајна постапка и се соочува со сериозни финансиски проблеми. Со тоа во неизвесност е доведено и работењето на македонската „Лајконет“, каде членуваат илјадници граѓани.
Зоран Витанов, помал акционер во „МајВорлд“ и дел од „Лајконет Австрија“, потврди дека компанијата е во активен стечај, но нагласи дека и понатаму пристигнуваат приливи од кешбек системот. „Лајконет е маркетинг агенција чиј единствен клиент е ‘МајВорлд’ и има ексклузивно право да рекламира над 400.000 фирми во светот. Сакам да нагласам дека кешбекот за членовите сè уште функционира. Дали тоа ќе биде доволно за ликвидност, не знам“, изјави Витанов.
Сепак, неизвесноста расте меѓу македонските членови на „Лајконет“. Дел од нив, според информации на Телма, најавуваат дека ќе бараат правна заштита за вложените средства.
Финансиските извештаи покажуваат дека „МајВорлд Македонија“ во последните три години остварила добивка од 266.000 евра. Сопственик на „МајВорлд“ и „Лајконет Австрија“ е бизнисменот Хуберт Фрајдл, чиј капитал се проценува на околу половина милијарда евра.
Извор: Телма
