Мајката на загинатиот Томас тврди: Братот на газда Деко од затворот во Скопје координира влијание врз сведоци во случајот „Пулс“
Во атмосфера на тензии и силни емоции, пред стартот на денешното судско рочиште за предметот „Пулс“, семејствата на загинатите јавно алармираа за, како што тврдат, сериозни обиди за влијание врз сведоци во постапката.
Јулија Златкова, мајка на Томас Златков кој го загуби животот кобната ноќ во дискотеката „Пулс“, изнесе обвинувања дека располагаат со информации за можни притисоци врз сведоци на Обвинителството. Според нејзините наводи, лицето Ј.Ј., кое се наоѓа во притвор во скопскиот затвор, му овозможувало користење мобилен телефон на Тодор Јованов, брат на обвинетиот, преку кој наводно се остварувала Вибер-комуникација со сведоци.
Златкова јавно побара од надлежните институции итно да ги проверат овие тврдења и темелно да се испитаат сите комуникации поврзани со наведениот телефон.
Таа потенцира дека трагедијата во „Пулс“ претставува, како што вели, „геноцид врз една млада генерација“, предизвикан од алчност, корупција и несовесно работење, и предупредува дека и по катастрофалниот настан, според нив, постојат обиди за прикривање и влијание врз судската постапка.
„Ние, родителите на убиените деца, нема да дозволиме вистината да се сокрие. Вистината мора да излезе на виделина и мора да има правда за нашите деца“, порача Златкова пред почетокот на денешното рочиште.
