Мајка на загинато девојче од Кочани: Кој има душа, разум и развиени мозочни ќелии, ќе застане рамо до рамо со нас – родителите, и ќе се бори за правда за убиените ангели!
„Кој има душа, разум и развиени мозочни ќелии, ќе застане рамо до рамо со нас – родителите, и ќе се бори за правда за убиените ангели. Така ќе покаже дека е совесен родител кој размислува за иднината на сопствените деца. Да кажеме стоп на криминалот, корупцијата, насилството и дилерите што ни ја уништуваат иднината. Половина деца ни се иселија, од оние што останаа – ги убија!“, порачува Верица Трифунова, мајка на загинатата Моника Спасова, во пресрет на седмиот „Марш за ангелите“ што ќе се одржи во сабота, 7 јуни, во Кочани.
Во својот јавен апел, Трифунова вели дека трагедијата не завршила само со смртта на децата, туку и со трајните последици врз оние што преживеале:
„Тие што преживеаја, трајно ни ги оштетија. Затоа, ако имате грам совест и човечност, барем за детските животи, придружете ни се – да се потсетиме што се вистинските вредности во животот, вредности што не се купуваат со пари.“
Маршот, кој се организира во чест на загинатите и во поддршка на закрепнувањето на повредените од пожарот во ноќниот клуб „Пулс“, ќе започне во 16:05 часот од Паркот на револуцијата. Потоа, учесниците ќе се упатат кон Трговскиот центар, пред Општина Кочани, Полициската станица и Основниот суд и Обвинителството.
Организаторите повикуваат сите граѓани кои се залагаат за неселективна правда и поддржуваат борба против неказнивоста, да им се придружат.
Сите надлежни институции се уредно известени за одржувањето на настанот, а медиумите се замолуваат со почит да ја проследат иницијативата, имајќи разбирање за болката и достоинството на семејствата на настраданите.
