М-НАВ: Тасевски призна дека штрајкот беше незаконски, свесно ја загрозува безбедноста
Раководството на Македонската навигација (М-НАВ) денеска излезе со остра реакција, тврдејќи дека претседателот на Струковиот синдикат на контролори на летање (ССКЛ), Александар Тасевски, на својата прес-конференција пред два дена јавно признал дека најавениот штрајк бил незаконски. Од М-НАВ го обвинуваат Тасевски дека свесно спроведува незаконски напад врз компанијата, ја загрозува безбедноста во авиосообраќајот и го руши угледот на институцијата и државата заради лична промоција.
Реакцијата на М-НАВ следува по прес-конференциите одржани на 22 октомври, прво од страна на адвокатот на М-НАВ, а потоа и од страна на Тасевски. Штрајкот, кој требаше да се одржи на 20 октомври, беше забранет како незаконски од страна на Основниот граѓански суд во Скопје.
Според М-НАВ, Тасевски самиот ја потврдил незаконитоста кога изјавил дека барањата за заштита на работнички права биле доставени уште во 2023 година и кога одговорил дека во евентуална нова најава за штрајк не може да ги наведе тие барања, бидејќи тоа би изискувало отпочнување на нова постапка за помирување.
„Во врска со изнесените наводи на г-динот Александар Тасевски јавно му се заблагодаруваме за неговото признание дека штрајкот… е незаконски и дека г-динот Александар Тасевски е свесен дека постапува надвор од закон“, се вели во соопштението на М-НАВ.
Од компанијата, исто така, го оспоруваат правниот легитимитет на ССКЛ да организира штрајк, наведувајќи дека тој е регистриран само како подружница на Независниот синдикат за сообраќај и врски и нема сопствен правен субјективитет. Според М-НАВ, сите синдикални активности, вклучително и штрајк, подружницата може да ги остварува единствено преку матичниот синдикат.
