Локалните избори ќе се одржат на 19 октомври – кампањата почнува на 30 септември
Претседателот на Собранието, Африм Гаши, денеска се очекува официјално да ги распише локалните избори, осми по ред од независноста на државата.
Гласањето во првиот круг ќе се одржи на 19 октомври, а вториот круг на 2 ноември. Граѓаните ќе избираат градоначалници и советници во 80 општини и во Градот Скопје.
Рокот за поднесување кандидатски листи истекува 35 дена пред изборите, односно на 15 септември. Државната изборна комисија (ДИК) ќе ги провери и утврди листите најдоцна на 27 септември. Изборната кампања ќе трае 20 дена и ќе започне на 30 септември.
Буџетот за организација на изборите изнесува 9,76 милиони евра, од кои две третини се наменети за медиумите и платеното политичко рекламирање. Дополнително, локалните самоуправи ќе ги покријат трошоците за надоместоци на избирачките одбори и транспорт на материјалот.
Еден од клучните рокови е увидот во Избирачкиот список, кој ќе почне 15 дена по распишувањето на изборите и ќе трае 20 дена. Во тој период избирачите со наполнети 18 години ќе можат да ги проверат и, доколку е потребно, да ги коригираат своите податоци електронски или во подрачните канцеларии на ДИК.
Според Изборниот законик, локалните избори се одржуваат на секои четири години, во втората половина на октомври. Во Градот Скопје функционираат 10 општини со поделени надлежности со градската власт. Досега локални избори се одржале во 1996, 2000, 2005, 2009, 2013, 2017 и 2021 година.
