Лидерска средба на повидок: Мицкоски бара консензус за реформите и укинување на техничката Влада
Укинувањето на техничката влада и постигнувањето поширок политички договор за реформските закони што се клучни за европскиот пат на државата се наметнаа како централна политичка тема на неделата. Во интервју за телевизија Алфа, премиерот Христијан Мицкоски најави дека од утрешниот ден ќе упати покани до политичките лидери во земјава за лидерска средба, која би требало да се одржи во рок од седум до десет дена, пред неговото заминување на Светскиот економски форум во Давос.
Мицкоски истакна дека очекува конструктивен пристап и консензус од лидерствата на сите парламентарни коалиции, особено кога станува збор за прашања од државен интерес и напредокот на Македонија кон Европската Унија.
– Да разговараме за правобранителот и за сите теми каде што немаме дијаметрално спротивставени ставови. Да покажеме зрелост како политичари и како држава, особено кога целта пред нас е Европската Унија. За реформските закони веќе има позитивни мислења од Венецијанската комисија и од Канцеларијата на ЕУ, па време е да седнеме и отворено да разговараме – порача премиерот во интервјуто.
Во делот за техничката влада, Мицкоски потсети дека и претставници на СДСМ пред минатите избори јавно изразиле став дека ваквиот модел повеќе не е неопходен. Тој нагласи дека актуелната влада, за разлика од претходните, покажува поголема инклузивност, што е важно во период кога се отвораат суштински прашања за реформите на политичкиот систем и реформската агенда поврзана со ЕУ, за кои е потребен поширок договор.
– Не би сакал да влегуваме во измени на политичкиот систем без консензус. Таквите одлуки не треба да се носат еднострано. Ако постои заедничка оценка дека техничката влада го кочи системот или отвора уставни дилеми, тогаш тие прашања треба да ги решаваме заедно – истакна Мицкоски.
Премиерот изрази уверување дека сите лидери на парламентарните коалиции ќе ја прифатат поканата за лидерска средба, посочувајќи дека дневниот ред нема да биде затворен и дека ќе може да се проширува со теми предложени од учесниците. Според него, токму отворениот дијалог и вклученоста на сите релевантни политички фактори се клучни за напредокот на државата во наредниот период.
