Лидерот на јеменските Хути им се закани на САД да не „прават глупави работи“ против нив
Лидерот на јеменските Хути во средата предупреди дека ќе ги нападнат американските воени бродови доколку Вашингтон одлучи да ги нападне, откако американските власти оваа недела формираа мултинационални сили за да се спротивстават на нападите на Хутите врз трговските бродови во Црвеното Море.
Хутите, кои контролираат голема територија во Јемен, од минатиот месец гаѓаат со беспилотни летала и проектили кон меѓународни бродови кои пловат низ Црвеното Море, што според нив е одговор на израелскиот напад врз Појасот Газа.
Безбедносната иницијатива составена од претежно земји на НАТО, предводени од САД, ќе патролира по Црвеното Море за да ги одврати и одговори на идните напади на Хутите кои досега доведоа до пренасочување на главните глобални бродски линии околу Африка.
„Нема да застанеме со скрстени раце ако Американците бидат во искушение дополнително да ескалираат и да направат глупост, таргетирајќи ја нашата земја или водејќи војна против неа“, рече Абдел-Малек ал-Хути.
„Секое американско таргетирање на нашата земја ќе го добие нашиот одговор, а американските воени бродови, интереси и навигација ќе ги направиме цел на нашите ракети, беспилотни летала и воени операции“, рече тој во телевизискиот говор.
„Се додека Американците сакаат да влезат во директна војна со нас, тие треба да знаат дека ние не сме тие што се плашат од нив и дека тие се соочуваат со целата нација“, рече Ал Хути.
Тој ги предупреди Американците да не испраќаат војници во Јемен, велејќи дека „ќе се соочат со нешто потешко од она со што се соочија во Авганистан и од она што го претрпеа во Виетнам“.
