Легендарната пекара го затвори својот бизнис пред Божиќ, по 70 години работа
Познатата пекара Хари, која се наоѓа во британскиот град Бедворт, престана со работа само два дена пред католичкиот Божиќ, кој се слави денеска. Сопствениците на пекарницата емотивно им се заблагодарија на своите клиенти за довербата, додека се подготвуваа за затворање, по 70 години работа.
Пекарата официјално е затворена од саботата, а Би-Би-Си потсетува дека овој семеен бизнис го најави затворањето во ноември. Сопственици се браќата Мартин и Ендрју Твигер, кои за радиото CWR изјавија дека биле трогнати од реакциите на заедницата, односно лојални клиенти, но дека сепак одлучиле да го стават клучот во бравата.
Инаку, јасно е дека на овој потег ги навела инфлацијата, иако се занимаваат со семејниот бизнис уште од детството. Едноставно повеќе не можеа да се носат со месечните сметки за струја од по 1.100 фунти.
– Не вреди повеќе да се работи – рекол Мартин Твигер (68).
Сепак, потсетувајќи се на својата работа, тој изјави дека браќата секогаш ќе се трудат да го извлечат најдоброто од сè што прават. „Не сакаме да правиме нешто од што нема да извлечеме максимум“, објасни тој.
Во меѓувреме, Ендрју Твигер опиша како често ги напуштале своите кревети помеѓу полноќ и 1 часот по полноќ за да го започнат својот работен ден. „Стануваш во глупаво време, имаш болки, почнуваш со работа и завршуваш доцна“, рече тој.
Тој ги повика луѓето да ги поддржат локалните бизниси, велејќи дека „тие нема да бидат вечно наоколу“, а неговиот брат им се заблагодари на сите што го поддржуваа нивниот семеен бизнис низ годините: „Се надеваме дека ќе го ценат она што го вложивме за да ги нахраниме“, додаде тој.
