Лазаров: Браво момци Македонци! Се гордеам со вас! Смирени и во моменти на провокации!
Македонскиот селектор и тренер, Кире Лазаров вечерва е очекувано среќен по големата победа на македонскиот тим над АЕК во Атина од 25-29 во првиот натпревар од финалето во ЕХФ Европскиот куп.
Лазаров истакна дека е премногу горд на своите момци Македонци кои покажаа како се брани македонскиот ракомет во Европа.
„Мора да им честитам на момците! Секоја чест за овие момци Македонци! Се гордеам со нив! Се договоривме да бидеме храбри и мудри, и така беше во текот на целиот натпревар иако воопшто не беше лесно со оглед на целокупниот притисок. Голманите беа на одлично ниво. Да, сите допринесоа многу да дојдеме до оваа голема победа од четири разлика, но мора да знаеме дека имавме вкупно 18 одбрани. Да не беше така сигурно и резултатот нема да беше тој. Се што се договоривме во 90% го исполнивме на мечот“ – изјави Лазаров.
Тој додава дека биле добро подготвени и за провокации од трибините, а со тврд предмет бил погоден и еден од играчите.
„Ние бевме подготвени на се, можеби и на потешки провокации, пожестока атмосфера. Бевме психолошки максимално подготвени на се. Можеби не требаше да реагираме на публиката. Имавме предност од три гола разлика во тие моменти, и очигледно беше дека сакаат да направат фора за да го свртат натпреварот во своја корист. Можеби мислеа и дека ќе наидат на млади и неискусни ракометари“, вели тој.
Како што додава, сега треба малку да ја прослават победата, а потребна им е и мала оддишка.
„Заслужија овие момци затоа што ја направија горда нацијата, бидејќи ова не е било каква победа. Останува пред нас краток одмор, затоа што направивме многу, можеби и го изненадивме противникот, но мора да знаеме дека ништо не е завршено. Ќе се подготвиме добро. Ни претстои реванш и затоа мора да бидеме многу, многу внимателни!“, порача Лазаров.
