Кузмановски: Ветувам чесна и одговорна работа, младите ќе бидат во фокусот на СДСМ во Демир Хисар
„Време е за промени, доста беше уништувањето од ВМРО-ДПМНЕ 4 години. Време е Демир Хисар да добие чесно, отчетно и одговорно раководење“, истакна на граѓанската трибина на СДСМ и Коалицијата, кандидатот за градоначалник на општина Демир Хисар Златко Кузмановски.
Порача дека актуелниот градоначалник и кандидат на ВМРО-ДПМНЕ ги изневери граѓаните, ветуваше многу, а реализираше нула.
„Граѓаните од секое населено место знаат и гледаат за неговото неработење, а разочараноста е и повеќе од видлива. Но, најтрагично е што младите во 4-годишното владеење воопшто не беа приоритет. Младите не смееме да ги гледаме само како бројка. Младите не смееме да ги гледаме само како иднина. Тие се нашата сегашност. Без млади, нема општина, нема иднина, нема ниту развој. Затоа нашата визија е јасна: младите да ја гледаат својата иднина тука, дома, а не во други држави“, порача Кузмановски.
Најави конкретни мерки за младите: изградба на младински центар, поддршка за младинското претприемништво, субвенции за млади бизниси, можности за практиканство и работа.
„Секој запишан ученик во СОУ ‘Крсте Петков Мисирков’ ќе добива по 3.000 денари месечно, а секој најдобар ученик од основните училишта и средното училиште ќе биде награден. Ќе обезбедиме ослободување од партиципација за градинка за децата кои доаѓаат од семејства од социјален ризик“, истакна Златко Кузмановски, додавајќи дека ќе биде обезбедена поддршка и за жените, кои мора да знаат дека општината е нивен сојузник и поддршка.
Кузмановски порача дека Демир Хисар мора да стане општина по мерка на граѓаните – општина која слуша, која е отворена и транспарентна. „Секој граѓанин ќе знае каде одат јавните пари“, подвлече тој.
Посебен акцент стави и на културата и историјата: ќе биде уреден спомен-паркот на Даме Груев во Смилево, како и сите локални патишта кои водат до него, за да се зачува историската меморија и да се поттикне локалниот туризам.
„Ветувам работа. Ветувам напредок. Ветувам безбедност, стабилност, иднина. Ветувам дека вашиот глас ќе биде дел од секоја моја, наша одлука. Изборите што доаѓаат не се само избор на градоначалник. Тоа е избор каков Демир Хисар сакаме. Ќе избереме дали остануваме заробени во минатото со нула реализација на проекти од страна на актуелниот градоначалник или ќе чекориме заедно кон иднината“, порача кандидатот за градоначалник на СДСМ за општина Демир Хисар, Златко Кузмановски.
