Кунгуловски излегува од бизнисот со лабораторија во „Жан Митрев“, но соработката продолжува
Бизнисменот и партнер на Жан Митрев, Горан Кунгуловски, повеќе нема да работи на лабораториски услуги со сопственикот на приватната клиника во новоотворената ординација и својата дејност ќе ја продолжи на друго поле со Био Инженеринг.
Биоинженерот со својата компанија како управител излегува од Жан Митрев Лабс, дијагностичка биохемиска лабораторија и лабораторија за молекуларна дијагностика, во Скопје Север, а на негово место доаѓа нова партнерска фирма – Фила Фарм. Кунгуловски е и коосновач на лабораторијата за генетика и персонализирана медицина во самата “Жан Митрев Клиника“.
Кунгуловски вели дека ќе се пренасочи на проект за скрининг на канцер кој бара целосен фокус и дека нема време да се концентрира на класичните лабораториски услуги, но и дека ја продолжува соработката со Жан Митрев.
„Се повлекуваме од функциите коишто беа поврзани со рутинска клиничка биохемија со цел да се фокусираме на нови поинтересни и постимулативни научно-истражувачки проекти во областа на молекуларната биологија и геномика на канцер. Во овие полиња продолжуваме со забрзан интензитет да соработуваме со клиниката Жан Митрев“, ни изјави Кунгуловски.
Новата „Жан Митрев Лабс“ беше отворена минатата година во мај како модерна лабораторија со широк спектар на анализи од областа на биохемијата, молекуларната биологија, микробиологијата и трансфузиологијата.
Био Инженеринг на Кунгуловски е основана како приватна компанија во 1998 години за високотехнолошко истражување и развој на нови производи, системи и иновативни технологии во областа на екологија и индустриска биотехнологија. Покрај медицината, врши услуги за произведувачи на храна и вода, вино, козметички производи, земјоделски компании, сточарски фарми, дистрибутери, угостители и друго
А.К.
