Куќен притвор за екс директорите Нино Васев и Нухи обвинети во случајот „онкологија“

Скопскиот Кривичен суд денеска донесе одлука за определување мерка куќен притвор за двајцата обвинети во случајот „Онкологија“ – поранешниот медицински директор на Универзитетската клиника за радиотерапија и онкологија, Нино Васев, и организацискиот раководител Нехат Нухи.

Двајцата се обвинети за сериозни злоупотреби поврзани со скапа терапија и дела што, според Обвинителството, претставуваат тешки повреди на здравјето на пациентите.

„Кривичниот совет при Основниот кривичен суд Скопје, постапувајќи по предлог на Основното јавно обвинителство, донесе решенија со кои против Н.В. и Н.Н. се изрекува мерка куќен притвор. Во сила останува и веќе определената мерка претпазливост – одземање на патната исправа и забрана за нејзино издавање, поради ризик од бегство,“ се наведува во соопштението од Судот.

Случајот, кој предизвика силни реакции во јавноста, се однесува на сомневања за манипулации со терапија за онколошки пациенти, што дополнително ја засилува тежината на обвиненијата.

Од Судот информираат дека странките имаат право на жалба пред Апелациониот суд Скопје.