КСЗД со препорака: Поголема заштита за бремените работнички на работа
Во услови на зголемен број пријави и утврдени случаи на нееднаков третман, Комисијата за спречување и заштита од дискриминација упати општа препорака до работодавачите во јавниот и приватниот сектор за доследна примена на законската заштита на работничките за време на бременост, раѓање и мајчинство.
Од Комисијата посочуваат дека работодавачите треба да се воздржат од практики кои доведуваат до нееднаков или понеповолен третман на жените во остварувањето на правата од работен однос во овој период од животот.
Препораката произлегува од повеќе случаи во кои е утврдено постоење директна интерсекциска дискриминација врз основа на пол и род, поврзана со бременост, раѓање и мајчинство во областа на работата.
Во документот се нагласува дека жените, особено оние со договори за работа на определено време, често се наоѓаат во понеповолна положба во однос на останатите работници.
Според Комисијата, проблемот делумно произлегува од постојната правна рамка за договорите на определено време, која не предвидува доволно ограничувања за нивната примена, поради што тие во пракса се користат како вообичаена форма на вработување.
Дополнително се наведува дека работодавачите често не продолжуваат соработката со работнички кои остануваат бремени, дури и во случаи кога постоела претходна пракса на продолжување на договорите или кога работната потреба не престанала.
Таквото постапување, како што наведува Комисијата, претставува дискриминација врз основа на пол и род, во врска со бременост, раѓање и мајчинство.
Во препораката се укажува и дека постојните механизми за заштита не секогаш ја препознаваат оваа форма на дискриминација во пракса, што дополнително ја отежнува правната заштита на погодените работнички.
