Кремљ ќе го продаде државниот долг за да ја финансира војната?
Според британското разузнавање, Кремљ ќе се обиде да го продаде државниот долг на Русија за да ја финансира војната.
Имено, британското Министерство за одбрана во дневниот извештај за ситуацијата во Украина наведува дека на 28 март рускиот премиер Михаил Мишустин изјавил дека се работи на процесот на продажба на дел од рускиот национален долг во странска валута.
„Тој потег е речиси сигурно показател дека Русија очекува надворешна финансиска поддршка од странски земји кои ги смета за пријателски“, соопшти Министерството.
По завршувањето на процесот, инвеститорите од други земји ќе можат да купат руски државен долг и на тој начин да финансираат дел од идните буџетски дефицити на Руската Федерација.
„Инвеститорите на тој начин индиректно би ја финансирале руската инвазија на Украина“
Со тој потег инвеститорите индиректно би ја финансирале руската инвазија на Украина, пишува Индекс. Во последниве месеци, руските банки беа главниот субјект кој го откупува државниот долг. Меѓутоа, прашање е колку тие во иднина ќе можат да ги финансираат руските буџетски дефицити на овој начин.
Руските власти веројатно гледаат на продажбата на надворешниот долг како еден начин да се пополнат дупките во финансиите за време на нападот врз Украина. Останува под знак прашалник дали ќе успеат да го спроведат тој план, пишува британското Министерство за одбрана.
