КРАТОВСКИ „СИЛЕКС“ ГО ИМАЛ РЕЦЕПТОТ: Како со намалени приходи од продажба се направи профит од 1,6 милиони евра

Кратовскиот комбинат
„Силекс“ покажува како се знае да се работи профитабилно, дури и со
намалени оперативни приходи во однос на истиот период лани. Компанијата го објави
својот деветмесечен Биланс на успех, а тој покажува дека таа во првите три
квартали остварила чист профит осд 1,6 милиони евра, што е раст за дури 54
отсто во однос на истата временска отсечка од минатата година.

Како е тоа можно во време
кога оперативните приходи се намалени за речиси една петтина, односно за 18
проценти, токму ова акционерско друштво го има рецептот.

Имено, во првите девет
месеци „Силекс“ има остварено оперативни приходи од одлични 14,3 милиони евра,
но, тоа е намалување во однос на истиот период минатата година за 18 проценти.

Каде потфрлила
компанијата на приходната страна?

Најголемиот дел,
разбирливо, се приходи од продажбата, кои го донеле главниот дел од приливите,
и тоа 13,1 милиони евра, но тоа е пад за 22 проценти во однос на истиот период
лани.

Од она што може да се
види од приходната страна се извлекува заклучок дека најголемиот „минус“ е кај
продажбата на домашниот пазар, или, тие приходи му донеле на „Силекс“ прилив за
девет месеци од 4,8 милиони евра, но тоа е намалување за дури 41 процент, што е
огромен пад на приходите кои треба да бидат носечки во една таква индустрија.

Додека, пак, оваа година
всушност најиздашните приходи се оние од продажбите на странските пазари, кои му
донеле на ова акционерско друштво прилив од 8,25 милиони евра. Тоа е раст за
речиси дупло, или за 88 отсто во однос на истиолт период од минатата година.

Оперативните расходи на
„Силекс“ биле 12,7 милиони евра, што е пад за 22 отсто во однос на истиот
период лани.

Од расходната страна за
пофалба е делот за трошоци за вработените, кој покажува дека за плати и
надоместоци на работниците компанијата потрошила над два милиони евра, што е
раст за 22 проценти.

Но, ако затаиле
приходите од продажбата, „Силекс“ во првите три квартали имал „ас во ракавот“ кој
се викал финансиски приходи, кои всушност му денеле 1,6 милиони евра, што е
раст за повеќе од двојно и што всушност ги „пегла“ намалените оперативни
приходи, и всушност ја создава солидната добивка на компанијата.

А, од друга страна,
финансиските расходи се многу ниски и речиси незначителни и тие биле на ниво од
34 илјади евра, или кај нив има намалување за 60 проценти.

Сетоа ова придонесува
„Силекс“ да прокнижи одлична добивка, иако основниот бизнис веројатно не му
одел сјајно, бидејќи е забележано намалување на основната приходна страна.

Н.Н.Ф.