Ковачевски: Со директни мерки обезбедуваме пониски цени на основните производи, никој нема да се справува сам со кризата
Претседателот на Владата на Република Северна Македонија, Димитар Ковачевски истакна дека со директни мерки се обезбедува пониски цени на основните производи.
„Одлуката за замрзнување на цената на белиот и полубелиот леб ја надополнивме со одлуки за замрзнување на цените на тестенините и укинување на царинските давачки за нив, како и замрзнување на цените на млечните производи.Како што визијата за успешноста на една компанија зависи од сите вработени, така и визијата за успешноста на едно општество зависи од сите граѓани кои живеат во него. Само заеднички можеме да придонесеме за подобра бизнис клима, подобри услови за работа, за поголема ликвидност на компаниите и конкурентен пазар“, истакна премиерот Ковачевски.
При тоа, премиерот Ковачевски додаде дека Владата навремено презеде мерки за одржување на ликвидноста на компаниите, но и за заштита на стандардот на граѓаните.
„Пакетот антикризни мерки од 760 милиони евра го креиравме за да бидат опфатени и компаниите и граѓаните. Ќе продолжиме и годинава да ги поддржуваме граѓаните и компаниите и нема да дозволиме сами да се борат со потешкотиите кои ги носи една од најголемите енергетски и економски кризи со кои се соочува светот. Со оваа криза ќе се избориме заедно, сите заедно, а не поединечно бидејќи само така ќе успееме да излеземе победници од предизвиците со кои се соочуваме“, рече премиерот Ковачевски.
