Ковачевски им порачува нешто на министрите?! – „Одговорите за вработувањата во М-НАВ треба да се бараат кај оние што имаат вработени роднини“
Премиерот Димитар Ковачевски денеска порача дека за одговорите околу вработувањата на роднини на министри во М-НАВ, да се бараат кај оние што имаат роднини вработени во оваа институција.
„Јас имав принципиелен став во однос на М-НАВ и гледам дека министрите што имале некого вработено во М-НАВ веќе си даваат свои ставови. Јас не можам да бидам портпарол на семејства на други луѓе, ниту сум претендирал да бидам тоа. Оваа тема ако се отвори тогаш ќе треба да проверите и во Академијата на судии кој се станува судија и обвинител, како и да проверите по министерствата. Таму на времето имаше еден поранешен министер, кој сега е многу гласен, кој дури и бебисистерката си ја вработи во Министерство за надворешни работи. Така што тоа е една карактеристика на општество во транзиција. Такви се сите општества во транзиција“, велиКовачевски
Според Ковачевски, доаѓа време кога професионализмот ќе биде клучен при вработувањата.
Инаку, претходно дел од медиумите излегоа со информации дека во Контрола на летање се вработени и роднини на вицепремиерот за политички систем и односи меѓу заедниците, Артан Груби како и на министрите за надворешни работи Бујар Османи и за земјоделство, Љупчо Николовски.
Николовски порача дека неговиот чичко е вработен уште пред тој да се роди, додека пак неговиот внук учел во Јапонија, Кина и Словенија.
