Ковачевски: Ќе ја тужиме Бугарија ако не ја укинат таксата за гас, поради тоа кај нас струјата и греењето ќе поскапи за 20%
За 20% ќе поскапи струјата и греењето во Северна Македонија, поради таксата воведена од страна на Бугарија за руски гас.
„Затоа побаравме да се ослободи капацитет за да може Северна Македонија да набавува гас од други извори, што нема да биде руски и со тоа нема да биде оптоварен со оваа дополнителна такса. Во моментот се водат разговори и на ниво на Европската Унија и со Бугарија со соодветното министерство за да може ова да биде направено. Минатата година успеавме заедно со Европската комисија и Бугарија да ослободиме капацитет за набавка на гас што не е исклучиво во сопственост на „Газпром“ и се надевам дека и годинава ќе успееме да го направиме тоа“, изјави премиерот Димитар Ковачевски.
Ваквиот став го пренел лично во понеделникот и на претседателката на Европската комисија, Урсула Фон дер Лајен.
Претходно, министерот за економија Крешник Бектеши изјави дека нема да прифати никаква уцена од никоја држава во делот на снабдување и загрозување на енергетската безбедност на државата, во врска со потегот на Бугарија да воведе такса за транспорт на руски гас низ бугарски гасовод.
Бугарија, во случајот на Македонија, го има дадено целиот капацитет на гасоводот под закуп на „Газпром“ до 2030 година. А тоа е единствен начин од кој Северна Македонија се снабдува со гас. Доколку не се ослободат капацитетитe, Министерот за економија рече дека Македонија ќе бара отштета од Бугарија и дополнителна поддршка од Европската Унија за воведувањето на таксата.
