Ковачевски: Држава се гради со векови, а руши со денови, тоа не смееме да го дозволиме
Премиерот Димитар Ковачевски вечерва од Крушево рече: Свесен сум, свесни сме, дека како и во минатото, така и сега, отпор, и внатрешен и надворешен има и ќе има.
Но, тој ќе биде поразен ако имаме фокус, енергија и самодоверба! Како што ја имале илинденците и асномците!
А за разлика од минатото, денешната независна и самостојна држава има многу пријатели и сојузници! Има голем број на подржувачи! Таа е дел од европското и светското семејство на нации и држави, на рамноправен начин. Затоа што ние од изолирана држава, по цела деценија, со мудри и храбри одлуки, успеавме да ја обновиме и засилиме меѓународната поддршка, како никогаш досега – рече Ковачевски.
На темелите на Крушевската Република, продолжи премиерот, на темелите на асномската Република Македонија, на современата и независна Република Македонија, на денешната европска Република Македонија, Ве повикувам заедно да го направиме следниот чекор, да успееме и повторно да победиме, рече тој.
Времето е различно, но принципите и вредностите се исти! И затоа мораме да продолжиме да ја градиме државата на европскиот пат! Ние друга алтернатива немаме и не смееме да имаме. Заради нас самите! Никој не смее да ја украде и измени нашата историја! Бидејќи тоа е невозможно! Никој претходно, а камоли сега, не може да украде, измени или избрише векови и векови создавана и развивана традиција, култура и засебност! На сите негирања однадвор и одвантре, мораме да се спротивставиме со врвно национално чувство, со висока национална самодоверба и гордост, и најважно од сѐ со здраво и разумно обединување околу заедничкото, за универзалните принципи и вредности! Во исто време, нашата борба мора да продолжи! – нагласи Ковачевски.
