„КОСТАЛ“ ВРАБОТУВА 1.050 ЛИЦА: Mинатата година остварила извоз од 130 милиони евра
„Костал“ вработува 1.050 лица, а минатата година остварила извоз од 130 милиони евра.
Директорот на „Костал“, Виктор Мизо кој воедно е и претседател на Советот на странски инвеститори истакна дека анализата за бизнис инвестицискиот индикатор на Советот на странски инвеститори за 2023 година, покажува дека Царинската управа е најдобра од сите државни институции, којашто секогаш има поддршка, отворена дискусија и транспарентност, објави ohridnews.
Подобрувањето на условите за водење бизнис е клучно за проширување на производствените капацитети, извоз на производи со повисока додадена вредност и нови работни места, беше потенцирано при денешната посета на фабриката за производство на делови и компоненти за автомобилската индустрија „Костал“ од страна на директорот на Царинската управа, Стефан Богоев.
Богоев заедно со директорот на „Костал“, Виктор Мизо, разговараа за активностите што ги презема Царинската управа како и за новите проекти коишто се реализираат со поддршка на Светска банка и ЕУ, меѓу коишто и Националниот едношалтерски систем.
„Задоволни сме што странските инвеститори препознаа во нас доверлив партнер, при што и јавно преку анкета не наведоа како орган од чија работа се најмногу задоволни. Ќе продолжиме и натаму интензивно да работиме на реализација на ветените проекти во висина од 30 милиони евра чија цел е олеснување на трговијата и транспортот и сузбивање на сивата економија и организираниот криминал“, истакна Богоев.
Мизо информира дека на средбата од нивна страна е предложено за можна времена мерка за дополнителна хармонизација на царинските стапки за увоз на производи од трети земји, што во нивниот случаи тоа е најчесто Азија. Тоа ќе доведе до зголемување на конкурентноста.
фото ohridnews
