КОСОВО СЕ ВООРУЖУВА: За три години потрошиле 250 милиони евра
Koсово се вооружува. Министерот за одбрана на Косово, Ејуп Маќедонци вели дека актуелната влада во изминатите три години купила вооружување во вредност од 249 милиони евра, јави дописникот на МИА од Приштина.
За телевизијата Клан Косова, Маќедонци изјави дека во оваа сума не е вклучен буџетот за косовските вооружени сили за 2024 година. Тој додаде дека набавките се направени врз основа на сеопфатниот транзициски план на Безбедносните сили на Косово.
„Набавките се ориентирани според концептот на купување држава со држава. Значи, инвестициите се вршени во соработка со релевантните министерства на земјите од НАТО со кои договаравме набавка, а се според стандардите на НАТО, бидејќи ние сме јасно ориентирани кон членство во Алијансата и во Европската унија“, рече Маќедонци.
Тоа што Косово се вооружува ја загрижува Србија. Претходно, српски политичари реагираа кога Косово доби оружје од Турција.
