KOСОВО МОЖЕ ДА СТАНЕ ЧЛЕНКА НА СОВЕТОТ НА ЕВРОПА: Усвоен е нацрт – извештајот на Дора Бакојани
Соседно Косово може да стане членка на Советот на Европа.
Парламентарното собрание на Советот на Европа (ПССЕ) вечерва го усвои нацрт-извештајот на известувачот за Косово во Советот на Европа, Дора Бакојани, во кој се препорачува да се одобри Косово да стане членка на Советот на Европа.
За прием на Косово во Советот на Европа гласаа 131 од присутните 171 член на ПС СЕ, 29 беа против, а 11 беа воздржани.
Косово ја поднесе својата кандидатура за членство пред две години, а таа беше прифатена на седницата во април лани. Парламентарното собрание на Советот на Европа ќе испрати препорака за прием до Комитетот на министри за надворешни работи, кој ја донесува конечната одлука со двотретинско мнозинство од министрите или амбасадорите кои ги претставуваат и кои се присутни во моментот на гласањето.
Состанокот на Комитетот на министри треба да се одржи од 16 до 17 мај во Стразбур.
Србија бурно реагираше на идејата Косово да влезе во Советот на Европа, а Бакојани ја обвинија за лицемерие.
foto freepik.com
