Кошаркарките ја освоија БиХ за прва победа по скоро – десет години (ФОТО)
Последниот триумф на жолто-црвените беше во јуни 2013 година, кога исто така на гостински терен ја совладаа Португалија (60-56). Потоа следуваа ужасни осум ипол години и многу загубени натпревари, меѓу кои имаше и такви со 70 или 90 поени негатива. Но, вечерва во салата „Илиџа“ во Сараево девојките го оставија срцето на паркетот и дојде до победа, која не значи ништо во пласманот, но која дефинитивно ќе донесе голем мотив не само кај репрезентативките туку и кај сите инволвирани во женската кошарка за напорна работа која би донела подобри денови.
Македонските ептен заслужено ја „освоија“ БиХ со оглед што водеа во текот на целиот меч, на почетокот и со двоцифрена разлика. Домаќинките само во финишот успеаја да се заканат, но нашите девојки најдоа сили да издржат до крајот и потоа заслужено да се радуваат. Анѓелика Митрашиновиќ со 18 поени беше најефикасна во нашата селекција, додека зад неа беа Нена Трајчевска со 17 поени и девет скока и Ивана Кметовска со 14 поени.
И покрај триумфот во Сараево, Македонија останува последна во квалификациската група за пласман на ЕП 2023 со скор 1-4. Лидер е Белгија со 4-1, следува Германија со 3-2, а БиХ е трета со 2-3. Последниот меч од циклусот нашите кошаркарки ќе го одиграат в недела во Скопје против селекцијата на Белгија.
