КОМПАНИИТЕ ДА ОРГАНИЗИРААТ ПРЕВОЗ ИЛИ ДА ИСПЛАТАТ ПАРИ ЗА ГОРИВО – еве го предлогот на Левица за заштита на работниците

Предлогот на опозициската Левица за враќање
на патните трошоци за работниците веќе стаса во Собрание. Како што напишале
самите предлагачи овој предлог закон ќе доведе до еднаква примена на законот
врз сите работници што ќе стимулира зголемена продуктивност на работниците и
подобрување на животниот стандард.

– Постоечкото законско решение и
Општиот колективен договор од областа на стопанството, предвидуваат можност
работодавците на свој трошок да обезбедат превоз од и до работното место од што
произлегува дека законот им го признава правото на работниците на надоместок за
превоз како трошок поврзан со работата. Бидејќи законот иницира на
претпоставката дека работникот за доѓање на работа прави трошок, и иако
граѓаните пред Уставот и законите се еднакви, во пристапот до остварувањето на
правото на надоместок за трошоците поврзани со работа работниците се
нееднакви – пишува во предлог законот доставен пред народните избраници.

Предлагачите додаваат дека ова
право на работниците не е облигаторна обврска за сите
работодавци, поради што работниците се оставени на добрата волја на
работодавачите. Поради овие причини, од Левица укажуваат дека ова право
кое им следува на работниците индиректно се трансформира во дискреционо право
на работодавецот да одлучи дали ќе им го овозможи на работниците или не, со што
една група на работници го ужива правото, а друга не.

– Законот за работните односи од
2005 година го признаваш овој надоместок, со тоа што неговата висина беше
утврдена со Оптшиот колективен договор од областа на стопанството од 2006
година. Одредбите подоцна беа укинати со Законот за изменување на Законот за
работните односи од 2008 година, а финансискиот товар за направените
трошоци остана на терет на работниците. Трошоците за транспорт за
едно домакинство минатата година во просек се движеле од 7 до
8 проценти од семејниот буџет, издатокот за
транспорт од и до работа е голем –
посочуваат од партијата.

Воедно, од Левица укажаа дека од земјите во
регионот, Србија со закон го уредува надоместокот за направен трошок за превоз
од и до работа, а работниците добиваат надомест во паричен износ во случај
работодавецот да не обезбеди превоз.

– Со тоа е изземен просторот
за манипулација од страна на работодавците, а работниците се подеднакви во
остварувањето на своето законско право – се посочува во предлог законот доставен во
Собрание.

Дополнуваат дека целта е работниците да имаат исти права. Со
промените кои ги предлагаат, во законот треба да стои „Работодавецот
на свој трошок на работниците им организира превоз до и од работното место или
им исплаќа трошоци за превоз“.

– Трошоците за превоз, кога нема
организиран превоз, се во висина на продажната цена на горивото, пресметана по просечна
потрошувачка на шест и пол литри гориво за изминат пат од 100 километри – стои во законот.

Воедно се предлагаат и два нови ставови
кои ќе гласат: Работодавачот на свој трошок на работниците може да им
организира исхрана за време на работа. Трошоците за исхрана можат да изнесуваат
најмногу до 20 проценти од просечната нето плата по работник
исплатена во претходната година.

Дали овие законски измени ќе поминат во Собрание е нејасно, дури и
тешко за очекување дека ќе бидат прифатени, поради фактот што опозициската
Левица често ги критикува владините избраници, а дел од нив веќе и јавно кажаа
дека нема да поддржуваат ниту еден нивни предлог.

П.О.