Компанија во Македонија плати милион евра за струја, а продаде канабис од само 330.000

Сонцеритас АД Скопје, единственото акционерско друштво за производство на медицински канабис во Македонија, минатата година платил сметки за електрична енергија од милион евра, а од продажба, поради законските ограничувања, направил приход од само 20 милиони денари, или околу 330.000 евра.

Германскиот инвеститор, чие седиште е во Скопје, а фабриката е во Росоман, работи од 2019, а од 2021 има статус на акционерско друштво. Трошоците од 134 милиони денари лани го довеле „Синцеритас“ во загуба од безмалку 2 милиони евра на крајот од минатата година.

Како трошоци за вработени биле исплатени 40 милиони денари, а во текот на годината поради ограничувањата со прописите и администрацијата, бројот на вработени паднал од 70 на 8 работници. Задолженоста по подигнати кредити е стигната до ниво од 10 милиони евра, а вкупната сметка за струја со настапувањето на енергетската криза се зголемила за двојно повеќе.

Акумулираните загуби од изминатите години изнесуваат 6,6 милиони евра, но инвеститорот сепак дал поддршка затоа што од оваа година се очекува позитивно работење по надминувањето на процедурите за извоз на производите од канабис.

„Последното ограничување се однесуваше
на тарифната ознака за производите од канабис – предмет на извоз, кое што во 2023 беше надминато
од страна на Царинската управа, поради што во моментов сме во процес на стекување тарифна
ознака за растворите со ТХЦ екстракти, но и со ТХЦ и ЦБД компоненти.
Во 2023 беше претставена правна процедура од страна на институциите за продажба на ТХЦ
производи на домашниот пазар, со што пазарот во Македонија за ТХЦ производи се отвори за
тргување. 

Со отстранувањето на овие ограничувања, компанијата очекува да започне да постигнува позитивни
финансиски резултати, а со тоа и полесно да функционира.
Во меѓувреме, компанијата се стекна и со европскиот ДПП сертификат („EU-GMP сертификат“) кој
што дозволува продажба на странски пазари каде е неопходно поседувањето на тој сертификат.
Така, во 2023, компанијата започна со извоз на производи во Германија. Во иднина, компанијата
планира проширување на пазарите во Обединетото Кралство, Полска и Нов Зеланд. 

Понатаму, во согласност со бизнис планот подготвен од страна на компанијата, проекциите за 2023
предвидуваат позитивни финансиски резултати до крајот на годината.
Главниот извршен директор на „Синцеритас“ има издадено писмо со поддршка, каде наведува дека
ќе ја обезбеди неопходната раководна поддршка за компанијата да продолжи со оперативни
активности во 2023“, се вели во ревизорскиот извештај на „Синцеритас“ испратен до „Македонска берза“.

Бизнисот со марихуана за медицинска употреба сè уште не почнал да носи пари во земјата како што се очекуваше. Производителите во меѓувреме континуирано бараа легислативни измени за олеснување на извозот.

А.К.