Комисијата за заразни болести предлага прогласување епидемија на голема кашлица во Скопје
Комисијата за заштита од заразни болести препорача прогласување епидемија на голема кашлица во Град Скопје. Меѓу препораките се вбројуваат и забрана за прием на невакцинирани деца во градинките, како и двосменска работа на вакциналните пунктови.
„Последните бројки се 18 потврдени случаи со голема кашлица. Имајќи предвид дека овој број расте, особено на територијата на Град Скопје, каде што се потврдени 14 случаи, одлучивме да предложиме прогласување на епидемија за град Скопје. Ова звучи страшно, но реално треба да ни олесни во справување со ризикот кој доаѓа со болеста голема кашлица. Очекуваме да излезе упатство за постапување во услови на епидемија од Институтот за јавно здравје и клучните активности треба да бидат насочени на пополнување на промашените вакцини. Нивото на вакцинирани за пертусис не е на задоволително ниво“, изјави д-р Александар Петличковски, претседател на Комисијата за заразни болести.
Тој ги повика сите кои ја пропуштиле вакцинацијата со редовниот календар да се вакцинираат.
Големата кашлица е болест која е најтешка за најмалите. Вакцинацијата по редовниот календар почнува во вториот месец. Дури една доза значително ги заштитува вакцинираните од сериозен тек на болеста.
