Комисија од тројца судии ќе го испита постапувањето на судијката Алексовска-Стојановска во случајот со Васил Јованов

Судиите Данка Ристова, Антоанета Димовска и Татјана Чачарова Илиевска се во формираната Комисија која ќе го испита случајот на судијката Даниела Алексовска-Стојановска од Основниот Кривичен суд Скопје. Комисијата има задача да утврди дали постоеле пропусти во одлуката на Алексовска-Стојановска, која за Васил Јованов, осуден за поседување и продажба на наркотични средства, изрекла воспитно-поправна мерка – упатување во поправен дом за малолетници.

Претседателот на Судскиот совет, Александар Камбовски, во изјавата по седницата на Судскиот совет, нагласи дека Комисијата треба да постапува со внимание и да не создава притисок врз апелационите судови. Тој истакна дека тие судови ќе треба да одлучат дали првостепената пресуда е исправна или не и дали постојат повреди во постапката.

Пресудата за кривичното дело на Васил Јованов, момчето кое ја прегази Фросина Кулакова на булеварот „Партизански одреди“ во Скопје, сѐ уште не е правосилна. Апелациониот суд уште не се има произнесено по жалбата, а јавноста активно го следи случајот, особено поради важноста на пресудата и одлуката за изрекување на мерката за воспитување на малолетникот.