КОЛКУ ПЛАЌААТ ЗА ПЛАТИ НА СВОИТЕ ВРАБОТЕНИ КОМЕРЦИЈАЛНА БАНКА, НЛБ БАНКА И СТОПАНСКА БАНКА СКОПЈЕ? Ова се деталите

Секоја од трите најголеми банки во земјава плаќа просечно месечно најмалку по 1,3 милиони евра трошоци за своите вработени. Тоа го покажуваат податоците од билансите од кои се гледа колку овие банки издвојуваат за плати, придонеси, награди, бонуси и додадоци за лојалност на своите вработени. Месечните просечни трошоци за вработени според најновите податоци кои ги анализираше „Фактор“ се движат од 1,3 до 1,6 милиони евра месечно – пари кои банките ги плаќаат за своите вработени

Најновите податоци кои ги објавија најголемите три македонски деловни банки „Комерцијална банка“, НЛБ Банка и „Стопанска банка Скопје“ покажуваат дека само за периодот јули-септември за плати на своите вработени исплатиле вкупно 13 милиони евра.

За сметка на тоа пак вработените во овие три најголеми деловни банки за периодот на летните одмори (јули-септември) на своите компании им создале вкупен профит од 48,9 милиони евра, покажува анализата што ја направи „Фактор“ врз основа на најновите податоци од неревидираните извештаи за првите девет месеци годинава кои ги вкрсти и спореди со податоците за првото полугодие.

На нашите банки работата одлично им оди, профитите се на ниво, па тие не штедат на плати за своите вработени. Во вкупната исплата на трошоци за вработените за периодот јули-септември предничи НЛБ Банка која во вкупниот износ учествува со 4,8 милиони евра што на пример е 950.000 евра повеќе во однос на трошокот што за своите вработени го исплатила „Комерцијална банка“ (изнесува 3,95 милиони евра). „Стопанска банка Скопје“ за третиот квартал годинава на вработените исплатила 4,2 милиони евра.

Од аспект на профитот во последниот односно третиот квартал годинава „Стопанска банка Скопје“ и НЛБ Банка се со речиси изедначени перформанси. Словенечката банка има добивка од 16 милиони евра за три месеци, а грчката банка има профит што е само за 100.000 евра понизок од НЛБ Банка. Најголема добивка во летните месеци има домашната „Комерцијална банка“. Нејзиниот профит изнесува 17 милиони евра.

Споредбата на нето приходи од камата што е најголема приходна ставка кај сите македонски банки без исклучок покажува дека третиот квартал годинава најдобро изработила „Стопанска банка Скопје“ чиј нето приход од камати е 25,2 милиони евра за три месеци. Следна е „Комерцијална банка“ со 22,9 милиони евра и НЛБ Банка со 16,2 милиони евра.

Од провизии и надоместоци пак во овој период најдобро заработила НЛБ Банка. Нејзиниот приход од оваа дејност изнесува 5,6 милиони евра. “Комерцијална банка“ од тие услуги остварила приход од 4,2 милиони евра, а „Стопанска банка Скопје“ 3,3 милиони евра.

(во милиони евра)