Кокаин и лекови за смирување пронајдени кај Стојанче Јовановски
На денешното рочиште во Основниот кривичен суд Скопје за случајот со смртта на Ивана Јовановска, сведочеше вештакот по судска медицина Златко Јаќовски, кој ги образложи наодите од обдукцијата и токсиколошките анализи.
Според неговото сведочење, кај Ивана Јовановска, покрај повредите здобиени од падот од зграда во скопската населба Тафталиџе, биле утврдени и крвни подливи на брадата и вратот.
„Дел од нив, како што наведе, се настанати десет дена пред смртта, а дел истиот ден или еден ден претходно.“
Вештакот посочи дека во текот на обдукцијата не биле пронајдени алкохол ниту други психоактивни супстанци во нејзиниот организам.
Во однос на обвинетиот Стојанче Јовановски, токсиколошките анализи покажале присуство на наркотични и седативни супстанци.
„Како што рече вештакот, во урината е констатиран кокаин со концентрација од 307,5 нанограми на милилитар, како и бензодиазепини во концентрација над 1000 нанограми на милилитар.“
Дополнително, според наодите, биле утврдени и дијазепам, нордијазепам и метаболит на кокаин.
Обвинителството го товари Стојанче Јовановски дека ја навел сопругата на самоубиство во период кога биле во бракоразводна постапка, како и дека ѝ ја загрозил сигурноста и ѝ нанел телесни повреди во рамки на семејно насилство.
Според обвинението, трагедијата се случила на 2 март годинава, кога Ивана Јовановска и нивната шестгодишна ќерка Катја го загубиле животот по пад од балкон во скопската населба Тафталиџе.
