Кога Партизан објави дека продал 11.000 сезонски, Ц. Звезда откри дека продала – 1.000 повеќе!
Црно-белите пред неколку дена објавија дека 11.000 навивачи ги обновиле сезонските билети од минатата сезона пред продажбата воопшто да почне, најавувајќи дека очекуваат бројката да дојде и до 15.000, што е феноменално дури и за далеку побогатите евролигашки екипи. Но, за да не останат покуси, црвено-белите денеска некако тивко, но со намера, пуштија информација дека досега продале 12.000 сезонски билети и дека побарувачката била огромна.
„Она што ни е важно и каде ќе се обидеме да направиме голем исчекор е настапот во Евролигата, каде што целта ќе биде пласман на фајналфор-турнирот. Сезоната ни почнува на 30 септември со меч во АБА лигата, а на 5 октомври ни гостува Асвел и само да потсетам дека останаа многу малку сезонски билети. Продадени се околу 12.500, а останаа околу 500-600 сезонски билети. Нека побрзаат нашите фанови, симпатизери“, изјави Небојша Човиќ, претседателот на Црвена звезда.
Белградските тимови, кои сите средби сезонава ќе ги играат во „Штарк арената“, летово потрошија невидени милиони на играчкиот пазар и направија тимови со кои лесно би можеле да го нападнат врвот на Евролигата, но тоа не ги спречува речиси секојдневно да си поделат по некој низок удар – буквално како мали деца.
