Коцевски: Водиме предистрага за вработени во УЈП, но и во други институции за десетина кривични дела во врска со пожарот во дискотеката „Пулс“
Државниот јавен обвинител Љупчо Коцевски потврди дека Обвинителството води предистрага за вработени во Управата за јавни приходи (УЈП), како и во други институции, за десетина кривични дела поврзани со пожарот во дискотека „Пулс“ во Кочани.
Коцевски изјави дека завршувањето на обвинението не значи дека завршила и целата постапка за пожарот, додавајќи дека податоците објавени од Истражувачката репортерска лабораторија (ИРЛ) не се нови и дека сите пораки се веќе доставени до одбраната и до судот.
„Јавното обвинителство уште од почетокот постапува по поднесена кривична пријава. Има отворена предистражна постапка во однос на сите останати институции, вклучувајќи и инспектори во УЈП. Постапката сè уште трае и не е завршена“, рече Коцевски.
Тој додаде дека постапката за друг предмет поврзан со пожарот во „Пулс“, што го води Основното јавно обвинителство за гонење организиран криминал и корупција (ОЈО ГОКК) против 13 полициски службеници, се одвива побавно бидејќи постапува само еден јавен обвинител. Тој истакна дека сите рокови се запазени и дека предметот ќе заврши наскоро.
Прашан за изјавите на премиерот Христијан Мицкоски во врска со документарниот филм на ИРЛ, Коцевски рече дека не сака да навлегува во политички коментари. „Политиката е една работа, работата на Јавното обвинителство е сосема друга. Јас и понатаму ќе работам чесно и законито, а другото го оставам на политичарите“, истакна тој.
ИРЛ објави документарен филм со наслов „Нашиот морален компромис“, кој содржи снимки и сведоштва од родители на загинати и лица кои биле во објектот, како и разговори меѓу сопствениците на дискотеката и инспектори на УЈП.
