Коцевски со прв коментар за изгласаната недоверба од Собранието – ќе поднесе ли оставка?

„Не можев да ја следам целата дискусија во Парламентот, овде во обвинителството имаме многу работа“

Вака само еден ден по изгласаната интерпелација во Собранието, државниот јавен обвинител Љупчо Коцевски за ВЕЧЕР ја отвора дилемата за тоа дали ќе си поднесе ли оставка или ќе остане на функцијата?

Коцевски вели дека засега не размислува да се повлече, туку напротив – „со пркос“ ќе продолжи да се справува со најсложените случаи на криминал и корупција.

„Не можев да ја следам целата дискусија во Парламентот, овде во обвинителството имаме многу работа, особено по откривање на големите случаи каде што моравме да ангажираме и по неколкумина обвинители. Политиката ја оставам на политичарите и ќе употребам еден тежок збор – пркос, пркос кон предметите за кои во моментов ве уверувам дека имаме многу цврсти докази да ги добиеме на суд“, изјави Коцевски за Вечер.

Според него, случаите „Онкологија“, милионскиот криминал на бизнисменот Крмзов тежок 90 милиони евра, како и убиствата поврзани со криминални пресметки се приоритети на Обвинителството. Посебно го истакна и предметот за пожарот во дискотеката „Пулс“, за кој, како што рече, лично се обврзал пред семејствата на жртвите дека ќе има правна разрешница.

Анкетата која покажува само 2% доверба во правосудството ја смета за нереална, но признава дека реален проблем е фактот што обвинителствата добиваат само 0,2% од државниот буџет, и тоа во време кога бројот на истраги е дуплиран.

На крајот, Коцевски испраќа апел до јавноста:

„Не верувајте во црната кампања против обвинителите. Борбата во која треба да победи правдата е заедничка.“