Коцевски: И покрај тоа што Груби и другите осомничени се во бегство, истрагата против нив продолжува
Државниот јавен обвинител, Љупчо Коцевски, изјави дека и покрај тоа што Артан Груби и другите осомничени се во бегство, истрагата против нив продолжува. Коцевски додаде дека јавните обвинители продолжуваат да преземаат дејствија и во однос на меѓународната потерница, а јавноста ќе биде редовно известувана за напредокот.
На прашањето за судијата Енвер Беџети, Коцевски информираше дека постапката за него е во предистражна фаза, како и за Артан Груби и други осомничени. Тој нагласи дека се собираат докази и постапката ќе продолжи како што е предвидено. Во однос на истрагата за поранешниот директор на УБК, Сашо Мијалков, Коцевски истакна дека истрагата се уште е во фаза на собирање докази.
Коцевски зборуваше и за финансиската истрага за случајот „Соравија“, велејќи дека постојат две одделни постапки – една за правната помош и една за ископување на природни минерали. Тој информираше дека Јавното обвинителство за организиран криминал и Основното јавно обвинителство во Скопје работат на овие предмети.
Во однос на случајот со ЕСМ, Коцевски соопшти дека Основното јавно обвинителство Битола води постапки за шест јавни тендери и дека Финансиската полиција е вклучена во истрагата.
Што се однесува на случајот со сертификатите за англиски јазик на Бојан Христовски, Коцевски изјави дека се чекаат одговори од Бугарија во врска со валидноста на сертификатот, по што ќе следи понатамошно постапување.
Во врска со истрагата за струмичкиот бизнисмен, Коцевски нагласи дека не може да открие детали заради тоа што се работи за предистрага и јавноста ќе биде информирана кога ќе има нови информации.
Покрај тоа, Коцевски одговори на прашањето за ставовите на експертите за судската реформа, нагласувајќи дека Советот на јавни обвинители работи согласно законот и не е посочен во негативна смисла од експертите.
На 14-тата седница на Советот на јавни обвинители се дискутирало за предложените координатори за подрачните виши јавни обвинителства, а се разгледала и одлуката за престанување на функцијата на јавниот обвинител Јован Серафимовски поради пензионирање.
